一連四場香港隊放題終於完哂，由旺角去到新加坡再去到新山，體會下唔同地方嘅足球文化，都算係一種幸福。

旺角紅旗場波，其實都係另一個開始，香港足球已經唔係嚟嚟去去同一班人睇、上Goal3 9up嗰個年代，啲嘢自動波埋位做好organic咁發生。

完場後第二朝即刻去新加坡，剛剛24個鐘之後即刻又睇一場同樣戲碼嘅比賽，以前都好似冇試過咁癲。睇住隊波唔少球員好耐之啲喺蒲崗村道打國際賽，到今日出到新加坡，都算係一種見證。

新加坡本土冇乜球迷，S P League睇嘅人唔多，到呢啲掛住國家隊牌頭嘅比賽，呢兩年打氣嘅球迷主要來自淡賓尼流浪、獅城水手兩隊，除此之外人數唔多，反而「越堤」嚟到Jalan Besar嘅大馬球迷都唔少。

講起Jalan Besar，呢個球場喺香港球迷心目中應該都有返咁上下地位，呢十幾廿年都有唔少球隊/球員留過腳毛，無論係亞協盃定各個年紀、男足女足，都一定去過，所以有幸嚟到呢個香港足球第二聖地，都叫圓左個夢。

去到今晚馬來西亞主場對香港嘅比賽要擺10pm踢，得唔夠4600個球迷入場，仲少過部分港超比賽，最主要原因，而家係當地齋戒月，呢個用裡面，穆斯林每天凌晨3至16時封齋（不吃不喝），要等日落之後先可以食嘢。所以場波擺咁夜，就係等球員可以喺食身一餐後有足球時間消化嘅安排。

而今次比賽嘅Sultan Ibrahim Stadium位於柔佛州首府新山（JB）旁邊嘅Iskandar Puteri（公主城），係大家都好熟悉嘅柔佛DT（JDT）主場。

但其實柔佛當地對國家隊一向唔太熱衷，尤其2013年JDT大搞之後先後「統治」馬超聯、甚至贏左2015年亞協盃；相反馬來西亞國家隊成績唔太好，加上柔佛一向嘅歷史同文化西馬其他州有少少唔同，所以你見到呢幾場波都冇乜當地人入場就係咁解。

而國家隊Ultras 組織「Ultras Malaya 」（UM07）同柔佛Ultras 組織「Boys Of Straits」係超不和，所以無論係今晚對香港、定早幾日對土庫曼嘅比賽，Ultras Malaya嘅成員都會包旅遊巴南下，但就唔見當地BOS嘅身影。其實佢地有啲人都有入場，只係唔join埋打氣，完場後仲喺UM07隔離示威。（ref : https://majoriti.com.my/……/lupakan-sengketa-dengan…… )

因為完場已經12am，執哂嘢等埋球員，差唔多1:30am先走到，呢一刻漏夜趕緊返新加坡。相比當年bad trip之最嘅印尼雅加達亞運之旅，呢7日瘋狂灌爆香港隊嘅行程，算係寫下左自己作客嘅紀錄了。

雖然一般嚟講都係backpack去作客，訓碌架床、訓機場、訓火車站，但比賽前又會join到大家一齊飲酒、叫車，然後入場，其實喺異地有咁多人一齊行，完場又同對方球迷互相致敬，比起睇外國波，睇香港足球畀到嘅呢啲經歷真係實在好多。